"Google Photo"da YENİ FUNKSİYA

"Google Photos" tətbiqində "Nano Banana" adlı süni intellekt modeli əsasında işləyən yeni fotoredaktə funksiyası təqdim edilib.

Bu barədə "Google" şirkətinin rəsmi bloqunda məlumat verilib.

Ən diqqətçəkən yeniliklərdən biri şəxsi redaktə rejimidir. İstifadəçilər "Mənə redaktədə kömək et" funksiyasından istifadə edərək konkret dəyişikliklər tələb edə biləcəklər. Məsələn, gün eynəyini çıxarmaq, üz ifadəsini yaxşılaşdırmaq və ya fotoda gözləri daha açıq göstərmək mümkündür.

Bundan əlavə, əvvəllər yalnız "Android" versiyasında mövcud olan dialoq pəncərələrinin redaktə interfeysi artıq tətbiqin "iOS" versiyasında da istifadəyə verilib.

Yaradıcılıq üçün əlavə imkanlar arasında tematik filtrlərin tətbiqi də yer alır. Məsələn, Renessans üslubu, mozaika kompozisiyaları və uşaq kitabı illüstrasiyalarını xatırladan stilizə edilmiş effektlər.

Şirkət həmçinin "Fotodan soruş" (Ask Photos) funksiyasının qlobal miqyasda genişləndirilməsini elan edib. Bu funksiya artıq 100-dən çox ölkədə və 17 dildə əlçatan olacaq. "Fotodan soruş" istifadəçilərə hadisələr, tarixlər və obyektlər üzrə şəkil axtarmağa, eləcə də sorğularına süni intellekt tərəfindən ətraflı cavablar almağa imkan verir.