KİV: Ötən il Aİ-də sığınacaq üçün müraciətlərin sayı azalıb

Avropa Sığınacaq Agentliyi (EUAA) tərəfindən 2025-ci ildə qeydiyyata alınan sığınacaq müraciətlərinin sayı ötən ilin eyni dövrü ilə müqayisədə təxminən 20 faiz azalıb.

Bu barədə "Welt am Sonntag" nəşri Avropa Komissiyasının ilkin hesabatına istinadən məlumat verib.

Nəşrin məlumatına görə, 2025-ci ilin yanvar ayının əvvəlindən dekabrın ortalarına qədər Avropa ölkələrində sığınacaq üçün təxminən 780 200 müraciət qeydə alınıb.

Qəzet qeyd edir ki, bu tendensiya əsasən suriyalı immiqrantlardan gələn müraciətlərin sayının azalması ilə bağlıdır.

Avropa Komissiyasının hesabatında həm ilk, həm də təkrar müraciətlər yer alır. Bu dövrdə Almaniyaya təxminən 149 100 müraciət təqdim edilib. Ardınca Fransa (148 600 müraciət), İspaniya (137 300) və İtaliya (125 800) gəlir.